Un ano máis celebramos no noso centro a Semana da Ciencia, este curso, con novidades: unha feira de proxectos multidisciplinares que o alumnado expón nos stands situados no vestíbulo do centro, co fin de mostralos a toda a comunidade educativa.
Ademais das actividades organizadas dende hai varios anos dende o Equipo de Dinamización da Biblioteca, este curso, o alumnado realizou en varias materias traballos de investigación relacionados coa ciencia ao longo do primeiro trimestre. Bioloxía e Xeoloxía, Tecnoloxía, Música, Física e Química, Economía, Filosofía ou Francés mesturáronse nesta Semana da Ciencia, amosando que as barreiras entre ciencias, letras e arte están máis diluídas que nunca, tecendo máis ben unha rede que encaixa á perfección coa educación STEAM que perseguimos.